ទីក្រុងចំនួន៣របស់កម្ពុជាបានឈ្នះជ័យលាភីទីក្រុងស្អាតអាស៊ាន
ទីក្រុងឆ្នើមរបស់កម្ពុជាចំនួន៣ នឹងទទួលជ័យលាភីទីក្រុងទេសចរណ៍ស្អាតអាស៊ាន លើកទី២ (Asean Clean Tourist City Standard Award) នៅទីក្រុងបានដាស៊េរីបេហ្កាវ៉ាន់ ប្រទេសព្រុយណេ នៅពាក់កណ្តាលខែមករា ឆ្នាំ២០២០ខាងមុខនេះ។
ទីក្រុងឆ្នើមទាំង៣នោះរួមមាន ខណ្ឌដូនពេញ (រាជធានីភ្នំពេញ), ក្រុងកំពត (ខេត្តកំពត) និងក្រុងតាខ្មៅ (ខេត្តកណ្តាល)។ នេះបើតាមអ្នកនាំពាក្យក្រសួងទេសចរណ៍កម្ពុជា។
ថ្លែងប្រាប់ KHB Media លោក ជុក ជំនោរ អ្នកនាំពាក្យក្រសួងទេសចរណ៍កម្ពុជា បានឲ្យដឹងថា បន្ទាប់ពីឆ្លងកាត់ការវាយតម្លៃយ៉ាងយកចិត្តទុកដាក់ពីសំណាក់គណៈកម្មាធិការវាយតម្លៃទីក្រុងទេសចរណ៍ស្អាតអាស៊ានបានប្រកាសថា មានក្រុងរបស់កម្ពុជាចំនួន ៣ ដែលបានឈ្នះជ័យលាភីទីក្រុងទេសចរណ៍ស្អាត នៅក្នុងតំបន់អាស៊ាន។
លោកថា ជ័យលាភីទីក្រុងទេសចរណ៍ស្អាត នៅក្នុងតំបន់អាស៊ានមានសុពលភាព រយៈពេល៣ឆ្នាំ ហើយនេះគឺជាលើកទី២ហើយ ដែលកម្ពុជាបានចូលរួម។ លោកថា ទីក្រុងឆ្នើមទាំង៣របស់កម្ពុជា ដែលទទួលបានជ័យលាភីនេះ គឺបានឆ្លើយតប និងមានលក្ខណៈសម្បត្តិគ្រប់គ្រាន់ទៅនឹងសូចនាកររបស់ស្តង់ដារទីក្រុងទេសចរណ៍ស្អាតអាស៊ាន។
អ្នកនាំពាក្យក្រសួងទេសចរណ៍រូបនេះ បានចាត់ទុកថា ជ័យលាភីទីក្រុងទេសចរណ៍ស្អាតទាំង៣របស់កម្ពុជា នៅក្នុងតំបន់អាស៊ាននេះ គឺពិតជាបានបង្ហាញពីការខិតខំប្រឹងប្រែងរបស់អាជ្ញាធរ និងស្ថាប័នពាក់ព័ន្ធ ពិសេសរដ្ឋាភិបាលកម្ពុជា។
មិនតែប៉ុណ្ណោះ ជ័យលាភីនេះ នឹងធ្វើឲ្យពិភពលោកបានស្គាល់ពីសក្តានុពលកម្ពុជាកាន់តែខ្លាំង ហើយកម្ពុជារំពឹងថា ជ័យលាភីទីក្រុងទេសចរណ៍ស្អាតអាស៊ាន នឹងកាន់តែបង្កើនភ្ញៀវទេសចរនៅក្នុងតំបន់អាស៊ាន និងពិភពលោកមកកាន់កម្ពុជាកាន់ច្រើន។ ជាងនេះទៀត វានឹងធ្វើឲ្យអាស៊ានក្លាយជាគោលដៅទេសចរណ៍ប្រកបដោយគុណភាព និងភាពទាក់ទាញ ផ្តល់ភាពកក់ក្តៅដល់ភ្ញៀវទេសចរថែមទៀតផង។
ស្តង់ដារទីក្រុងទេសចរណ៍ស្អាតអាស៊ាន ត្រូវបានដឹកនាំរៀបចំដោយក្រសួងទេសចរណ៍កម្ពុជា តាំងពីឆ្នាំ ២០១១ ដើម្បីឆ្លើយតបតាមសំណូមពររបស់រដ្ឋមន្ត្រីទេសចរណ៍អាស៊ាន នាឱកាសវេទិកាទេសចរណ៍អាស៊ាន ឆ្នាំ២០១១ នៅរាជធានីភ្នំពេញ។ ស្តង់ដារនេះត្រូវបានអនុម័ត និងដាក់ឲ្យអនុវត្តជាផ្លូវការដោយកិច្ចប្រជុំរដ្ឋមន្ត្រីទេសចរណ៍អាស៊ាននាឱកាសវេទិកាទេសចរណ៍អាស៊ានកាលឆ្នាំ២០១៥។
ការគ្រប់គ្រងសំណលរឹង ការរក្សាភាពស្អាតនៅតាមទីសាធារណៈ ការរៀបចំ និងថែទាំបង្គន់អនាម័យសាធារណៈ ការរៀបចំសាងសង់បន្ថែម និងពង្រឹងការគ្រប់គ្រងមជ្ឈមណ្ឌលព័ត៌មានទេសចរណ៍ និង ពង្រឹងសន្តិសុខ សុវត្ថិភាព និងសណ្ដាប់ធ្នាប់សាធារណៈ គឺសុទ្ធតែជាបញ្ហាចម្បង ដែលបេក្ខភាពប្រឡងទីក្រុងទេសចរណ៍ស្អាតអាស៊ាន ត្រូវដោះស្រាយមុនគេ ដើម្បីប្រជែងយកជ័យលាភីសម្រាប់ប្រទេសកម្ពុជា។ នេះជាការលើកឡើងរបស់លោក ថោង ខុន រដ្ឋមន្រ្តីក្រសួងទេសចរណ៍ នៅក្នុងពិធីបុណ្យសមុទ្រនាខេត្តកំពត។
គួរបញ្ជាក់ថា បេក្ខភាពដែលបានចូលរួមក្នុងចលនាប្រឡងប្រណាំងទីក្រុងទេសចរណ៍ស្អាតអាស៊ានលើកទី២ ខាងលើនេះរួមមាន៖ ក្រុងកំពត (ខេត្តកំពត), ខណ្ឌដូនពេញ (រាជធានីភ្នំពេញ), ក្រុងកំពង់ចាម (ខេត្តកំពង់ចាម), ក្រុងពោធិ៍សាត់ (ខេត្តពោធិ៍សាត់), ក្រុងតាខ្មៅ (ខេត្តកណ្តាល), និងក្រុងកំពង់ឆ្នាំង (ខេត្តកំពង់ឆ្នាំង)។
ប៉ុន្តែជាលទ្ធផល មានតែទីក្រុងឆ្នើមចំនួន៣ប៉ុណ្ណោះដែលបានឈ្នះជ័យលាភី ក្នុងនោះមាន ខណ្ឌដូនពេញ (រាជធានីភ្នំពេញ), ក្រុងកំពត (ខេត្តកំពត) និងក្រុងតាខ្មៅ (ខេត្តកណ្តាល) ដែលអាចទទួលបានជ័យលាភីក្នុងការប្រឡងប្រណាំងទីក្រុងទេសចរណ៍ស្អាត អាស៊ានលើកទី២ សម្រាប់ឆ្នាំ២០២០-២០២២ នាឱកាសវេទិកាទេសចរណ៍អាស៊ាន (ATF) នៅប្រទេសប្រ៊ុយណេដារូសាឡឹម នាដើមខែមករា ក្នុងឆ្នាំ២០២០ខាងមុខ៕
