តើការកាត់ប្លង់កម្មសិទ្ធអចលនទ្រព្យមានដំណើរការយ៉ាងដូចម្តេច?
ភ្នំពេញ៖ ការកាត់ប្លង់កម្មសិទ្ធិលើអចលនទ្រព្យ ជូនអតិថិជនមានសារៈសំខាន់ខ្លាំងចំពោះអតិថិជនដែលជាអ្នកទិញអចនលទ្រព្យដោយសារ ការកាត់ប្លង់កម្មសិទ្ធិគឺធ្វើឡើងដើម្បីបញ្ជាក់ឲ្យកាន់តែច្បាស់ពីម្ចាស់អចលនទ្រព្យណាមួយ និងសិទ្ធិស្របច្បាប់លើការកាន់កាប់អចលនទ្រព្យទាំងនោះ ជាពិសេសផ្ទះលំនៅឋាន និងដីធ្លី។
ចំពោះសំណង់លំនៅឋាន បុរី ផ្ទះល្វែង ដំណើរការនៃការកាត់ប្លង់កម្មសិទ្ធិជូនអតិថិ ជននៅពេលទិញលំនៅឋានគឺជាបន្ទុកខាងភាគីបុរី ដែលជាអ្នកអភិវឌ្ឍន៍ លើការធានារ៉ាប់រងចំពោះការផ្ទេរនិងកាត់ឈ្មោះកម្មសិទ្ធិជូនអតិថិជន រហូតដល់ម្ចាស់លំនៅឋានទទួលបានកម្មសិទ្ធអចលនទ្រព្យស្របច្បាប់។
លោក កូយ សីហា ប្រធានផ្នែកលក់ និងចាត់ការទូទៅរបស់បុរីធីវីស្តា បានថ្លែងថារាល់អតិថិជនដែលបានទិញលំនៅឋានរបស់បុរី គឺខាងបុរីនិងធ្វើការកាត់ប្លង់ជូនពួកគាត់ដោយផ្ទាល់ ដោយមិនបង្កការប៉ះពាល់ និងរំខានដល់អតិថិជនឡើយ។
លោក កូយ សីហា មានប្រសាសន៍ថា៖«ការកាត់ប្លង់រឹងជូនអតិថិជន ភាគច្រើន គឺខាងបុរីជាអ្នករត់ការឲ្យពួកគាត់តែម្តង។ ក៏ប៉ុន្តែភាគីទាំងពីរត្រូវមានការសហការពីអតិថិជន ក្នុងអំឡុងពេលដំណើរការកាត់ឈ្មោះដើម្បីផ្ទេរកម្មសិទ្ធិចាំបាច់ត្រូវមានគូរភាគីទាំងពីរ ដើម្បីផ្តិតមេដៃ ពីម្ចាស់ប្លង់(បុរី)និងអ្នកទទួលសិទ្ធិក្នុងការកាន់កាប់ប្លង់កម្មសិទ្ធិនេះបន្ថែមទៀត និងដើម្បីឲ្យមានការទទួលស្គាល់តាមផ្លូវច្បាប់»។
លោក សីហាថា៖ «ដំណើរការនៃការកាត់ប្លង់គឺមិនចំណាយយូរនោះទេគឺត្រឹមតែ៣ខែ តែប៉ុណ្ណោះ ហើយលក្ខណៈមួយចំនួនដែលអតិថិជនទទួលបានប្លង់នោះគឺ ពួកគាត់ត្រូវ បង់ជូនបុរីនៅតម្លៃ៣០ភាគរយមុននៃចំនួនតម្លៃផ្ទះ។»
ការកាត់ប្លង់រឹងជូនម្ចាស់លំនៅឋានគឺត្រូវធ្វើឡើងទៅតាមស្ថានភាពនិងលក្ខណៈនៃលំ នៅឋាន ហើយដំណើរការនៃការកាត់ប្លង់រឹងនេះទៀតសោធគឺ ធ្វើនៅមន្ទីរសូរិយោដី។ ទោះជាយ៉ាងណាការកាត់ប្លង់រឹង(ផ្ទេរកម្មសិទ្ធត្រូវមានឯកសារមួយចំនួនដើម្បីធ្វើការកាត់ប្លង់)។ 
ទន្ទឹមនឹងនេះ ប្រធានផ្នែកលក់ដដែលរូបនេះបានបញ្ជាក់ថា៖«ការផ្ទេរប្លង់កម្មសិទ្ធគឺអតិថិ ជនត្រូវមានឯកសារមួយហើយអតិថិជនត្រូវ មកផ្តិតមេដៃទទួល។ ឯកសារទាំងអស់នោះរួមមានជារួមយើងផ្អែកទៅលើខាងសូរិយោដី តែខាងយើងជាអ្នកសម្រួលឯកសារ គឺ មានអត្តសញ្ញាណប័ណ្ណសញ្ញាតិ្តខ្មែរសំបុ ត្រកំណើត សៀវភៅគ្រួសារនឹងសំបុត្រអាពាហ៍ពិពាហ៍អោយស្របទៅនឹងនីតិវិធីច្បាប់»។
លោកសីហា ចាត់ការទូទៅរបស់បុរីធីវីស្តាថ្លែងថា៖«នីតិវិធីនៃការផ្ទេរកម្មសិទ្ធិអោយស្របច្បាប់ ចាំបាច់ត្រូវមានការចូលរួមដឹងឮពីរដ្ឋបាលសុរិយោដីថ្នាក់រាជធានី-ខេត្ត ឬរដ្ឋបាលសុរិយោដីថ្នាក់ក្រុង-ស្រុក-ខណ្ឌ ជាស្ថាប័នមានសមត្ថកិច្ចទទួលពាក្យសុំចុះបញ្ជី។ រដ្ឋបាលសុរិយោដីថ្នាក់រាជធានី-ខេត្ត ដែលអចលនវត្ថុតាំងនៅជាស្ថាប័នមានសមត្ថកិច្ចចុះបញ្ជី។»
លោកសីហាបន្ថែមថា៖« អតិថិជនភាគច្រើនបានសួរថានៅពេលកាត់ប្លង់ បុរី មានបានសហការជាមួយធនាគារទេ? នេះជាបញ្ហា ដែលអតិថិជនត្រូវដឹង នោះគឺមិនពាក់ព័ន្ធគ្នានោះទេ។ លុះត្រាតែអថិតិជនយកប្លង់ទៅដាក់ជាមួយធនាគារតែប៉ុណ្ណោះ។»
លោកបញ្ជាក់ថា៖« អតិថិជននិងទទួលបានសារៈសំខាន់ខ្ពស់ពីព្រោះបុរីនឹងធ្វើការចេញប្លង់ជូន ដើម្បីមានសិទ្ធិកាន់កាប់អចលនទ្រព្យនេះបានយ៉ាងពេញលេញដោយមិនមានការខ្លាចពីបញ្ហាផ្សេងៗឡើយ។ ការផ្ទេរកម្មសិទ្ធិនេះគឺមានការទទួលស្គាល់ពីគ្រប់មជ្ឈដ្ឋានដោយអតិថិជនមិនព្រួយបារម្ភនោះទេ។»
លោក ងួន សុខសាន្ត ប្រធានផ្នែកទំនាក់ទំនងអាជីវកម្ម និងពាណិជ្ជកម្មអ្នកគ្រប់គ្រងទូទៅរបស់ធនាគារ Bred Bank បាននិយាយថា ធនាគារមិនបានចូលរួមនិងពាក់ព័ន្ធជុំវិញការកាត់ប្លង់នោះទេ ព្រោះការកាត់ប្លង់កម្មសិទ្ធគឺ ភាគីដែលពាក់ព័ន្ធមានតែអតិថិជន និងម្ចាស់បុរីដែលជាម្ចាស់ប្លង់កម្មសិទ្ធ ដើម្បីធ្វើការផ្ទេរសិទ្ធកាន់កាប់តែប៉ុណ្ណោះ។
លោកសុខសាន្តមានប្រសាសន៍ថា៖ «ករណីដែលធនាគារពាក់ព័ន្ធក្នុងការកាត់ប្លង់មានតែលក្ខខណ្ឌតែមួយប៉ុណ្ណោះគឺអតិថិជនធ្វើការកម្ចីជាមួយធនាគារដោយដាក់ប្លង់ផ្ទះដែលត្រៀមនឹងដាក់ក្នុងធនាគារធ្វើការកម្ចីប្រាក់ ពីធនាគារ»។ លោកបន្តថា៖ «បើក្រៅករណីខាងលើ ធនាគារមិនមានសិទ្ធិក្នុងការកាត់ប្លង់ជាមួយភាគីទាំងពីរឡើយ។»
គួរបញ្ជាក់ថា ប្លង់រឹង គឺសំដៅលើប័ណ្ណ ឬប្លង់ដែលចេញដោយរដ្ឋបាលសុរិយោដី ប៉ុន្តែអ្នកខ្លះយល់ថា ប្លង់រឹងសំដៅលើកិច្ចសន្យា ឬលិខិតផ្ទេរសិទ្ធិកាន់កាប់អចលនវត្ថុ (ទោះជាមិនទាន់បានចុះបញ្ជីសុរិយោដី/គ្មានបណ្ណ)ដែលបានបញ្ជាក់ដឹងឮពីអាជ្ញាធរឃុំ-សង្កាត់ និងក្រុង-ស្រុក -ខណ្ឌក៏ដោយ ប៉ុន្តែវាមិនមែនដូច្នោះទេ។
